Innovación: variables clave e rutas.

Observador grupo A (Pablo Sánchez Ferro)

A innovación é un proceso de cambio que espera introducir algún tipo de mellora na produción e no funcionamento dunha organización. A innovación parte da base dunha inquietude por mellorar as cousas. Ten que xurdir dunha cultura organizativa aberta a construir unha oportunidade de optimización dos procesos produtivos para a satisfacción do usuario ou cliente.

A innovación implica a existencia dun liderado, xa sexa unipersoal ou pluripersoal, que xere entusiasmo e compromiso na organización. Ese liderado concrétase nun grupo de traballo que procura, coa concurrencia do resto da organización, detectar as necesidades do cliente e darlles resposta mediante un procedemento de traballo fundado sobre a base de obxectivos.
As variables esenciais que determinan a innovación son: as necesidades, os recursos e a planificación. O proceso de implantación do funcionamento organizativo proactivo cara á innovación segue unha ruta composta polos seguintes pasos:

1) inquietude do grupo de traballo;

2) transmisión da inquietude e vencemento das resistencias no conxunto da organización;

3) detección de necesidades;

4) definición de liñas de mellora;

5) estudo de ferramentas, recursos e capacidades da organización para determinar a viabilidade das liñas de acción posibles;

6) selección dos proxectos e programas segundo a anlálise, coa acotación de lindes asumibles;

7) implantación na organización (execución) dos procesos coa determinación do(s) responsable(s) e a asignación de tarefas;

8) estudo de resultados; e

9) nova análise para a seguinte mellora (feedback).