Innovación: so apta para directivos e directivas sen medo

Estaba eu pensando en que tiña que facer o resumo para o blog sobre a clase do pasado xoves e en como plasmar a enerxía, o entusiasmo e a paixon de Enrique de la Rica, cando lin o post de Javier sobre o mesmo tema. E me dixen: pero que vas ti a engadir? Javier conseguiu transmitir ese entusiasmo, porque a el tamén (corríxeme Javier se me equivoco) lle apaixona o tema da innovación. Así que imos tratar de aportar modestamente algunha reflexión persoal.

Lembremos algunhas ideas desgranadas por Enrique de la Rica:

A innovación é o acordo afortunado entre os problemas e o talento (capacidade individual do ser humano). Sen problemas non hai innovación (outro profesor deste curso, R. Carballo, decía que non hai innovación sen escasez).A verdade é que tendemos a ser conformistas, somos reticentes aos cambios e quizais na administración pública esta tendencia acentúase.

Pero ¿que é o talento? A suma de coñecemento e creatividade e hoxe en día con Internet o coñecemento alcanza a súa máxima difusión. Un exemplo: os blogs como xeradores de coñecemento. (Eu tamén vou facer un pouco de publicidade do noso blog sobre xestión do coñecemento, Casiopea, navegando pola xestión do coñecemento)

Todos nós traballamos en distintas organización e todas as organizacións teñen un obxectivo: perdurar. ¿Cómo se consigue eso? Alcanzando cada vez millores resultados, e para acadalos hai que xerar valor no que producimos.As IDEAS son a fonte principal de xeración de valor.

Innovar é convertir as ideas das persoas en valor para o cliente, ou, se o preferimos no noso ámbito, para o cidadán.

Quizais o que me parece máis difícil de conseguir é que as persoas dunha organización teñan ideas, xeren ideas. Estando dacordo co que Enrique de la Rica decía, non podía deixar de pensar no meu entorno laboral e facer Uffff!!!!! Que dificil cambiar as dinámicas!

O que si está claro é que hai que arriscar. Se alguén non da o primeiro paso é dificil que as cousas cambien e eu tamén estou un pouco farta de oir tanta queixa e ver tan pouca acción. O que queira peixes ten que mollarse.

Estamos nun curso de directivos, así que traballemos para cambiar ese estilo de dirección que mata as ideas. E loitemos contra a rutina e o aburrimento, fomentemos espacios informais que axuden na xeración de ideas, tomemos decisión e equivoquémonos, pero sin dramas: sexamos capaces de extraer coñecemento do fracaso.

Ademáis da enerxía de Enrique de la Rica gustoume a súa visión de futuro. El predica que hai que orientar a organización ao futuro e está claro que el vai moi por diante. Eu son mais modesta e simplemente aspiro a ser capaz de distinguir as oportunidades que se lle presentan a miña organización e sacar proveito delas, e sobre todo a vencer o medo a equivocarme.

Isabel Casal